تبلیغات
توركجه شعر،قیسا حیكایه و یئنی چئویرمه لر - - ÖlKəMiN sƏsİ - بیزیم ائو..

امروز:

بیزیم ائو..

بیزیم ائو..

منیم یئریم چوخ یاخشی، ایستی، راحات.. یئمک ده پیسدن- یاخشیدان تاپیب کئچینیرم. آتام هر گون بیزه سان وئریر! و اؤیره دیر نجور گئت-گل ائدک قونشوموزلا قارشیلاشمایاق و نجور قوخولارین ایزینی دوتوب یئمک تاپاق(بدون اینکه) بونسوزکی تله یه دوشاق یا آجی داوالارین گؤزل قوخوسونا آلداناق.. هرنه دن اؤنملی بولارین قونشودان گیزلی اولماسیدیر. بیز همئشه چالیشاریق اونلار بیزی گؤرمه سین لر. آخی گؤرنده اینجی ییب باغیریرلار. آنام دئییر: قونشونون خانیمینین گؤزو بیزی گؤتورمور، یوخسا کیم قونشوسونو بئله گودر!! نئچه کز بیزیم یئمک لریمیزه آجی زهر تؤکموشدو، قارداشیم(تله لری ایشدن سالماق متخصصی) دئییر تله لرده اونون ایشی دیر، قونشو خانیمین توطعه(؟)لری  ببورادا بیتمه ییب بیزیم ان بؤیوک دوشمانیمیزا دایاق اولوب ائوینده ساخلاییر(بیز بو دوشمانین ان دادلی دوزلو یئمک لریندنیک) او بیزیم حاققیمیزدا بئله ایشلردن الیندن گلسه اسیرگه مز. نئچه کز اوز-اوزه گلمیشیک، ایقتیدارلی و گوجلو اولارکن چوخ قورخاق بیریسی ایدی.. هر دفعه منی گؤرجک قورخوب رنگی آتار، بیراز منه باخیب سونرا باغیرار:«سیچان!!!»

آتام دئییب بو سؤزو ائشیتدییین آن اؤزونو ائوه یئتیرمه لی سن! یئهین قاچماق بیزیم گونده لیک درسلریمیزدن ساییلیر، بو اوزدن «سیچان» سؤزو او قادینین آغزیندان چیخینجا من ائوه یئتیردیم. هئچ زامان دایانمامیشام گؤروم بو سئحیرلی سؤزده نه لر وار. آتام دا دایانماییب گؤرسون نه اولاجاق، بیله سیندن سوروشاندا هیرسله منه باخیب دئدی: « بو آتالاریمیزدان قالان بؤیوک درس دیر. هئچ زامان ایسته مه بونو سینایاسان» بو دانیشیقدان سونرا من 7ساعات حققیم یوخویدو ائشیگه چیخام و آنام آخشاما کیمی منه آجی باخیردی. آما من دوشوندوم گله جکده بو سئحیرلی سؤزون آنلامینی تاپمالی یام. بلکه گله جک نسیللریمیز بو چتین لیک لری گؤرمه سین لر...

یازار:آی سو


نوشته شده در : دوشنبه 17 مرداد 1390  توسط : ائلمان اورمو اوغلو.    نظرات() .

برچسب ها: بیزیم ائو ، قونشو ، قادین ، سان ، سیچان ، گله جک ، چتین لیک ،