تبلیغات
توركجه شعر،قیسا حیكایه و یئنی چئویرمه لر - - ÖlKəMiN sƏsİ - من بو گون سئوگیلیم له گؤروشدوم

امروز:

من بو گون سئوگیلیم له گؤروشدوم

من بو گون سئوگیلیم له گؤروشدوم

های هارای من بوگون سئوگیلیم له گؤروشدوم

منه دئمیشدی ایالت ده شهرداری بیناسینین اؤنوده دور، گلیب گؤره جه یم سنی..

الیمده كی قیرمیزی چیچك هارا گئتدیییمی دونیایا آنلادیردی.. تالواسال

جانیمی  بوروموش، اللریم تیتره ییر، گولون قوخوسو منه بیرگؤزل

حیسس وئریردی، هردن آرابالارین سیقنال چالماسی منه هاردا اولدوغومو

آنلادیردی، بؤیرومدن گئچن لرین هره سی بیر سؤز دئییب گولوردولر،

آما نه دئدیك لرینی آنلامیردیم..

ساعات 6:30 گؤزلریم یولا دیكیلیب؛ گؤرن بو اوچ یولون هانسی منیم

وارلیغیمی منه یئتیره جك!؟؟

بیر قادین آجی آجی سؤز دئیركن گئچدی آجی باخیشلاری منی توشلاییردی.

آچیب  مئساژینی بیر داها اوخودوم.  یازیب «آلتی دا گله جه یم»  بو اوتوز

 دیقه ده بلكه اوتوز كز اوخوموشام بونو..

گؤزلریم هر گلن آرابادان اونو ایسته ییر.. گؤز یاشلاریم النیر.. داریخیرام..

آما بونو بیلیرم كی منی اونودوب یا آلداتمایاجاق. او، یوردونا و ائلینه گؤزل

 اینسان اولدوغونا گؤره هئئئئچ كیمی آلداتماز!!

آرابالار سیقنالی منی دیكسیندیریر، آما من هر گلن آرابادان اونو ایسته ییرم،

 یالنیز اونو...

وای.. وای.. گؤزلریم نه گؤردییینه اینانمیر..!! وای.. باغیرماغادا گوجوم یوخدو..

«بیر شوشه سی توستولو قارا آرابادان بیر جوت تانیش گؤز منه باخیردی..

اوزونه یاییلان قان، و گؤز یاشلاری منه گئت دئییردی..»

 و من بیر داها سئوگیلیمین مئساژینی زیمزیمه ائتدیم:«... بئش ده خییام دا

ییغیناق وار. من یولداشلاریملا بیربیریمیزه سؤز وئرمیشیك سونونا كیمی

دایاناق! آلتی دا اوردان گلیب سنی شهرداری بیناسینین اؤنونده گؤره جه یم،

  ببه ییم آلتی دا اوردا اولارسان...»

توستولو شوشه نین  دالیندان  باخان  گؤزلر نه  پئشمانییدی نه یورغون،

 بلكه اومودلا گله جه یه باخیردی و باغلی قوللاریندا بیر قوجاق سئوگی

منه و ائلینه داشیییردی...

من بوگون سئوگیلیم له گؤروشدوم.

یازار: آی سو


نوشته شده در : جمعه 20 خرداد 1390  توسط : ائلمان اورمو اوغلو.    نظرات() .

برچسب ها: سئوگیلیم ، ایالت ، شهرداری بیناسی ، خییام ، قیرمیزی چیچك ، باغلی قوللار ، گله جك ، ائل ،